香江花月 (利舞臺廣場) (已結業)

之前見雜誌介紹利舞臺嗰間主打火鍋同精緻點心嘅「香江花月」，一直想搵個機會嚟試下，咁啱今日要嚟銅鑼灣換禮券，趁機過去食個午餐。餐廳陳設以 50 年代嘅舊香港為藍本，甫出升降機，一幅幅經典電影油畫海報隨即映入眼簾。中庭位置放了一部古董電單車，再配以琉璃綠色幕簾，令人有恍如置身於舞台劇場般。另外餐廳設有七彩波波燈鏡房，環境超夢幻，啱晒鍾意周圍去打卡影靚相嘅朋友仔！今次嗌咗一個炒飯同三款點心。姬松茸鮮竹卷：鮮竹卷真材實料，內有竹筍和茶樹菇，菇菌清香怡人，腐竹透薄不韌，加上充滿姬松茸菌香嘅熱湯，滋潤又美味。金粟金魚餃：擺盤好有意景，金魚餃白裡透紅，入面嘅蝦肉大大隻，爽彈味鮮，配上粟米清湯，睇落好似喺池塘暢游一樣，令人賞心悅目。另外呢款紅袍荔枝亦係必食之選，用上紅色糯米皮做出外層，而內餡則以荔枝茸及奶黃混合製成，皮層脆中帶煙韌，奶黃餡心微甜香軟，色香味俱全。最後嚟一碟迷你鴛鴦炒飯，賣相好吸引，色彩鮮艷，綠色嗰邊係菠菜汁配雞肉和菜心，而紅色嗰邊就係紅肉火龍果汁配蝦仁同帶子，食落口感好豐富，非常醒胃，有營又健康。整體來說，餐廳嘅佈置非常用心，座位闊落舒服，店員亦招呼周到，絕對值得再訪。