越風味地道越南料理

營業中

休息中

晚餐諗唔到食乜，所以上OpenRice睇吓附近有乜食，見到呢間越式菜評價好高，所以入咗去。所揀嘅嘢都係大家熱門推介嘅。鮮茄蟹肉湯"Banh Da"粉, 真係第一次食，之前從來聽都未聽過。有蟹肉嘅鮮味同非常香濃嘅茄味，所有配料都非常之精緻，仲有軟殼蟹腳一件。未食過嘅，點都要試吓。不過今日好熱，未感受到佢嘅精髓。豬頸肉撈檬嘅炸豬頸肉都算冇得輸，粉紅色嘅豬頸肉非常嫩滑，外面炸得香脆可口。因為天氣熱，所以想食撈檬。但係呢碗撈檬加埋個汁，都係有暖暖哋嘅感覺，做唔到解暑嘅效果。檬粉嘅質地有啲似米粉。如果花生同乾蒜片多啲就好啦。牛油果沙冰係大家推薦嘅，而我又好鍾意牛油果，所以一定要試。牛油果味都算唔錯，最好嘅地方係非常之滑。不過可能因為平日飲開更多更好嘅牛油果飲品，呢杯嘢唔算突出。同埋天氣好熱，作為一杯沙冰佢唔夠凍。可能落去嘅時間比較多人（晚上7:30）、坐得唔算好舒服。張枱好細，好迫。