星海薈﹒譽宴

營業中

休息中

阿媽話疫情期間好耐冇飲茶，今日就孝敬下佢老人家，石門呢間酒店裏面有間中式酒樓，不過門口就要喺另一邊入，呢間星海薈裝修都好靚，而且人流較少，冇平時酒樓嘅嘈雜聲，適合靜靜地傾偈。求其嗌左幾個點心，冬筍鮮蝦餃隻蝦好大隻，夠新鮮。蠔皇叉燒包一籠三個，唔會太多肥肉，都OK。比較特別嘅係安格斯和牛腸粉，啲牛肉真係比較有牛味，同平時嘅腸粉唔同！鮮蝦腐皮卷我都推介，外皮夠脆，蝦膠都彈牙，好味呀！仲有薑蔥蒸牛柏葉，份量都幾多，薑蔥味好出，邊食邊嘆茶都係幾好。另外特登叫咗兩碗白胡椒濃雞湯灌湯餃，胡椒味幾重，飲完好暖胃，隻灌湯餃超大隻又足料，仲有一件雞，所以食完都飽飽哋。