生記飯店

營業中

休息中

得到契B仔一家邀請，抱住期望一試呢間連續十一年得獎米芝連，以懷舊菜式聞名嘅高價粵菜館。乳豬全體，無肥膏而且皮夠薄脆，一讚。蓮藕餅個人認為只屬一般。薑蔥蠔薑蔥爆得好香，調味亦恰好，好味。酥炸生蠔，見到炸漿有啲大舊，加上呢排食得太多熱氣嘢，我無試。枸杞豬膶，豬膶似厚切牛舌般咁厚，口感好滑，有驚喜，招牌菜之一。蝦膠滿滿嘅蝦多士，面頭鋪滿芝麻，能做到多士唔油膩，跟甜酸汁好匹配，值得一試。古法蒸魚腸，以陳皮僻去腥味，我只食到陳皮味同蛋，但食唔到魚腸，反而食到好似有叉燒～吓？怪怪哋。小食之一椒鹽豆腐，無乜味。三黃燒雞，雞唔肥膩且有鹹香味，唔似一般燒雞或炸雞，食得出廚師嘅用心。蒸鹹鮮，馬友魚好滑，香蔥加鹹鮮味如配飯或粥會好夾，可惜已經太飽。又一招牌菜梅子蒸蟹，好新鮮嘅煮蟹方法，但就蓋過蟹嘅鮮甜，不過梅子味調教得好好，好醒胃。最後用白糖糕作結尾，無過度發酵嗰種酸味，個人覺得甜咗少少，充滿懷舊味道嘅一餐，可惜有一點點名過於實，值得一讚侍應服務好殷勤。