家賀屋

銅鑼灣藏有唔少高質素嘅樓上餐廳，家河屋就係其中之一，環境舒適座位寬敞，適合同朋友共享晚餐。巨峰提子梳打 $40: 大大杯，唔會太甜，味道清爽。特選刺身盛 $238: 三文魚、吞拿魚、油甘魚、深海池魚、赤海蝦、八爪魚各兩片，樣樣都算新鮮，厚薄適中。每款兩塊分享淺嘗啱啱好！月見櫻花海老丼 $220: 二重奏丼定食又有飯又有烏冬，啱晒有選擇困難症嘅我。紅蝦刺新鮮甜無比，撈埋三文魚子同埋蛋黃一齊食味道更上一層樓。旁邊仲有滑嘟嘟嘅茶碗蒸、沙律同埋湯好豐富！海膽龍珠卷 $148: 大大粒橙黃色嘅醬油漬蛋黃鹹香滋味，加埋海膽同埋吞拿魚蓉，超級滿足！西京燒熟成黑豚腩肉 $98: 以白味噌調味，味道帶微甜，咬落油脂充盈。鹽燒油甘魚頭 $68:撥開魚皮，魚肉嫩滑富油香，簡簡單單鹽燒已經好正。