Lilium

營業中

休息中

周末同屋企人黎呢間新裝修既餐廳。呢到位置唔明顯，行近太古坊方向過黎既話，就要經便利店轉入黎。但店面外觀好特別，一望就會望到。可能天氣轉涼，舖頭無開冷氣，而係開哂一個個窗，感覺好通風舒服，亦十分環保！店內氣氛亦好舒適寧靜，好似去左一間遠離市區既小店咁。我地兩點幾先到，岩岩好可以食下午茶。我叫左滷肉飯，屋企人就叫左貴妃雞卷配炸雙色地瓜條。雖然係下午茶，但滷肉飯依然足料！滷肉肥瘦適中，而且仲食到少少軟骨，無論肥肉瘦肉抑或軟骨都好入味同軟淋。另外仲配有紫椰菜中和滷肉既膩感，溏心蛋既熟度亦剛剛好！偷食左屋企人叫既雞卷同炸地瓜條。呢份下午茶淨係外表已經夠吸引，雞卷亦算係技巧菜式，雞肉好嫩滑，炸地瓜條用左紫薯同甜蕃薯，對比一般炸薯條感覺更健康！跟餐可以再叫小食，我地就叫左肉燥伴A菜，味道都唔錯！另外仲叫左兩杯野飲。屋企人叫既係蝶豆花茶，睇落藍藍紫紫咁好靚；而我就叫蜂蜜柚子綠茶，甜度適中。呢間台式小店真係好高質，性價比確係高，絕對係值得回頭再食既餐廳！