餐廳環境清幽，可能加上限聚令嘅關係，入面非常寬敞，完全冇侷促嘅感覺，仲可以同朋友靜靜哋傾吓偈享受一下寧靜嘅環境。
餐牌嘅相影得好靚，睇見都吸引，加上朋友推介呢間陳儀興，令我充滿期待。
杯碟等餐具都非常精緻，而且全部都印有同一個風景圖案，相信就係潮汕一帶嘅風景啦！
先來一個前菜生醃賴尿蝦，帶微酸嘅汁醃製嘅賴尿蝦感覺非常清新，有少少似泰式生蝦刺身咁，食落好開胃！
食潮州菜其中一樣主打就係食鵝片，所以我哋揀咗鵝片拼墨魚，估唔到佢嘅份量超多，下面仲有滷水豆腐，鵝肉嫩滑肥美，墨魚亦非常彈牙，我認為可以一試再試！
潮州菜嘅第二主打就非蠔餅莫屬啦，呢個蠔餅充滿蛋香，啖啖蠔仔肉，而且做得好乾身，完全無油膩嘅感覺，真係好高質嘅蠔餅！
就咁食餸有啲重口味，所以叫咗碗潮州白粥，雖然完全冇任何調味，但都食到有米香，感覺唔錯！
店員推介我哋夏天最好飲番杯老藥桔，開頭聽到有個「藥」字以為會好重藥材味，但其實飲落去甜甜哋，有啲似夏枯草之類咁，生津止渴！
最後食個潮式甜品，原本想叫反沙芋，但朋友話唔鍾意外邊一層砂糖嘅感覺，所以最後我哋叫咗福果甜芋泥，呢個對我來講比較甜少少，但勝在芋泥打得非常滑口，白果好淋，正！
呢餐真係食得好飽，以前喺九龍城食過潮州菜，環境比較舊式傳統同埋好有家鄉嘅感覺，而呢度就係一個充滿格調嘅潮州菜館，能夠享受正宗潮州風味之餘環境亦特別舒適高尚，令人非常享受滿足！
