班蘭葉印尼餐廳

營業中

休息中

好耐冇出去食飯啦！過海嚟到銅鑼灣，見到呢間好多人等，決定食呢間印尼小店！首先，舖頭細細但係入到去裝修都幾別緻。叫咗一個羊肉沙嗲串燒，唔好睇羊肉細細㗎但係好入味，配埋嗰個醬汁更加夾！之後不得不叫既係三重芝士炸碎雞撈麵，首先芝士已經非常吸引！仲要有三隻芝士非常正配埋撈麵勁入味！然後炸雞最重要嘅係有秘製辣椒，辣椒好入味加埋真係幾辣，配埋辣椒加芝士撈麵超級好味😋第一個主菜已經非常滿意！另一個主食嗌咗巴東斑蘭尖塔飯，一定唔可以唔食就係呢個綠色嘅飯，食落去有浸淡淡的椰汁香味，有種優雅嘅味道！配埋非常入味嘅巴東牛肉，一濃一淡啱啱好！香料味道好特別，大家可以試吓，感受一下係印尼風情！最後一定要叫返一杯斑蘭沙冰！斑蘭好適合同香料重嘅餸菜配埋一齊飲，有煥然一新嘅感覺可以解解油膩感啊！最後值得一讚嘅係，店員嘅服務態度好好，好友善同埋能夠顧及客人嘅需要。所以我明白點解呢度咁值得大家一齊幫襯，希望有好嘅生意！