潮城潮汕火鍋

營業中

休息中

近日去咗旺角一間叫潮城嘅潮汕火鍋店，天氣凍，打邊爐實在係一個好選擇，特別係想食返啲正宗牛肉。今次我哋試咗匙仁同埋嫩肉兩款牛肉，店員好細心咁教我哋每款肉應該煮幾多秒先至最啱食。匙仁帶住少少細筋，食落有嚼勁，牛味濃郁；而嫩肉完全冇筋，口感嫩滑，入口即化，兩款都好高質。除咗牛肉，我哋仲叫咗羊肉片，羊味唔算羶，反而好香，容易入口。湯底方面，我哋揀咗牛骨湯底，湯入面有粟米、蘿蔔同埋少量西芹粒，煮耐咗之後更加香濃，唔會太膩，打邊爐啱啱好。配料方面，魚皮餃同埋潮州魚蛋絕對係必試！魚蛋彈牙得嚟好有真材實料嘅感覺，魚皮餃亦都好夠滑。仲有生菜，夠鮮甜，煮完唔會話變黃或者腍晒，幾新鮮。最後試咗個炸獅頭鵝肉丸，外層炸到金黃酥脆，咬落去內餡非常彈牙，香口又滿足。