鳳鳴居

營業中

休息中

呢間鳳鳴居勁到可以喺旺角開分店都排曬隊，梗係要過嚟上水總店朝吓聖，唔算太近火車站，行過去都要7-10分鐘左右，但隔離左右都起碼7-8間餐廳，似乎附近街坊都係去開呢頭開餐。今日一個人嚟食，好快就等到位，入門前就俾張鳳鳴男隊S嘅相震撼咗，但完全唔知係咩嚟，有人知嘅麻煩留言指教吓。餐牌選擇都唔少，又有得車仔麵咁揀唔同餸，我就嗌咗個最出名嘅醉雞湯麵，今日食油麵，湯底真係好好味，配埋紅棗雲耳，個湯仲帶啲鮮甜酒香味，非常滋味，雞都好嫩滑，有六七件，好豐富，呢個價位嚟講我覺得幾抵食。另外試多個豉油王鵝腸，一嚟到發覺芽菜仲多過鵝腸就覺得唔太抵，同個麵同價，份量少咗啲，但食落都好爽口，希望下次食鵝腸可以多返啲啦。對鳳鳴居整體感覺非常好，嚟緊無論係上水定旺角都一定會經常幫襯，但希望再開分店，唔駛咁耐啦。