鳳鳴居

話說今日黎到上水，鍾意藥膳味道嘅我梗係要去食吓鳳鳴居。一個人，拎左飛，門口等。前面有個伯伯到飛，入去坐低左。中間隔左幾張二人枱，然後終於輪到我，但喺無人講聲嘅情況下，我對面突然坐低多個人，原來要搭枱。Ok ge, 明白生意好，一個人食無理由霸一張二人枱，但係點解開頭唔放埋我入黎同伯伯搭枱呢？有趣🤔到落單，叫左個最經典嘅醉香雞米粉，加杯凍檸茶，口痕想食埋個蒜辣雞翼尖😌侍應落單無表情，無回應，明嘅，唔係個個都有一個想服務嘅心，都係打份工姐。落完單，收到張單，5分鐘未夠碗麵已經到，佩服佢出餐速度。以湯底黎講，我覺得佢聞落同飲落都有藥材香，係幾好，不過可能淨係藥材唔夠味，所以另外有加調味料，所以飲飲吓覺得個湯底有啲鹹，不過都係可接受。突然，帶位個女人行埋黎換左我張單，無出聲。我見到張單少左個雞翼尖，我心諗應該係賣晒，舉手問一問，果然。但帶位個姐姐，你過黎換單，起碼都同個客講聲吖？換左張單就算，啲野賣晒又唔講，你唔係prefer我要知你地咩事吓話？講到尾，味道方面係有，但未驚艷到我會為咗個味道而忍受佢哋嘅態度…查看更多

香港樓面黑面對客已經係常態，本來唔值得特別表揚佢哋。但呢間舖居然可以請到全部5~6 個同樣黑面，同樣冇表情的員工，我真係覺得要頒個獎俾佢。而且黑面員工效率極高，客人放低筷子5分鐘已經有人執枱，無論你隻碗仲有冇食物，都會極速收走。執完張枱之後2分鐘就會有人趕你哋走，效率之高，我相信係香港頭十名。我相信有好多餐廳老闆會想知呢班員工究竟係點樣訓練嘅，可以考慮吓開班賺錢。最後提提大家呢間舖頭只收現金，OpenRice寫話收Alipayhk 是錯誤資訊。…查看更多

作為上水居民，呢幾年比較出名嘅上水餐廳一定係佢。食咗好幾年，其實相比起佢最出名嘅醉雞湯米，個人係更鍾意麻辣雞湯米同芫荽雞湯米🤣特別係麻辣雞湯米佢辣得嚟唔會好重味精，食完唔會覺得好鹹成日好想飲水咁。而且佢啲雞普遍都幾嫩滑，吸埋啲汁真係好正。依家雖然都仲係好多人排隊，但間唔時都係會想嚟食，即使要等一陣先入座。…查看更多

早排見到有人喺社交平台問：「上水有冇啲有Live Band嘅餐廳？」結果街坊們好快就推介左鳳鳴居(笑)。#鳳鳴兒童合唱團不定時演出九成時間都要排隊既鳳鳴居，夏天想去幫趁記得帶風扇仔。⸻淨係計湯底都有13款口味，今次嗌咗2款人氣雞湯麵：1. 芫荽雞湯麵 ─日落荽山 $61芫荽多到成座山咁，成碗綠油油好似落咗森林咁。建議啲芫荽一上枱即刻撳落湯度浸，鍾意食軟身嘅會更啱口味。除咗視覺衝擊，味道都一樣咁荽利，推介俾芫荽控一試。2. 蟲草花雞湯麵 $64冇芫荽山咁誇張，但都鋪滿咗差唔多三分一碗，湯底偏甜。一年四季，每次唔知食乜就會叫佢。⸻鳳鳴雞既然叫鳳鳴居，點都要講下佢既雞。佢哋用嘅唔係一般我雞見到既黃油雞，色澤偏白，但雞味香濃。肉質視乎分到邊個部位，煮雞既時間大致上都控制得唔錯，除非係中咗雞胸就會偏柴啲。⸻檸檬茶鳳鳴居嘅檸檬茶好有誠意，茶底夠濃，檸檬片通常有三塊以上，飲落好夠味。不過冰就比較多。⸻1. 炸三兄弟魚片頭、花枝丸、醬爆肉丸組成嘅「兄弟組合」，雖然喺凍肉舖都買到，但鳳鳴居用炸嘅方式處理，炸得啱啱好。尤其係醬爆肉丸，每次咬開都有肉汁，好啱幾個人Share嚟食。2. 可口可樂飲落冇特別，不過張單會有啲小驚喜，想知乜嘢自己去試下啦！⸻建議：- 麵量幾大，細食或者當日冇咁肚餓，可以考慮叫少麵。- 排隊時間長，唔想排咁耐，建議早啲去或者避開繁忙時段。- 建議去多幾次，可以試晒咁多個湯底。⸻鳳鳴居係一間有個性、湯底選擇多又好味道嘅街坊小店，帶出雞味，唔只食物出色，氣氛都好有驚喜既鋪頭。…查看更多

我選左加配漢堡扒($8)😊。醉香湯底帶有濃郁嘅酒香，雞湯鮮甜，雞肉嫩滑。有齊雞脾、雞翼同胸背部位。識食嘅雞米一定要配米線☺️，米線吸滿湯汁，大滿足。湯裡面仲有紅棗同雲耳，增添口感同健康感。瑞士雞翼✅️好入味，讚。價錢定價合理💲，好味得嚟又滋補🔝。Lunch嚟講係一個唔錯嘅選擇。✨️提一提午餐時間餐廳人流眾多，記得預留至少15至20分鐘等位時間📍鳳鳴居上水馬會道154號地舖#homeieatfood #homeieatfood_上水 #homeieatfood_上水 #sheungshui #上水美食 #醉雞 #鳳鳴居 #foodie #hkfoodie #thai #chill #vibe #cocktail #泰式 #打卡美食 #美食推介…查看更多