花晨月夕

花晨月夕Omakase Moon⭐️先付⭐️刺身五款⭐️御料理⭐️寿司十貫⭐️吸物⭐️甜品 Omakase moon 套餐入面嘅第1道菜係先付，有六至七種食材，當中包括酒煮鮑魚、香魚丶蝦，整體嘅烹調口味都偏向懷石料理嘅風格。之後嘅5道刺身每一道質素都好高，首先係鯛魚片配魚子醬，餐廳加入左液態氮，再用紙沾上一層水，整成一個巨大嘅空氣球，當空氣球破開嘅一刻，煙霧彌漫嘅景象真係一個視覺享受。北海道馬糞海膽配三文魚子亦都好精彩，三文魚子係自家醃製，每一粒都超級鮮甜爆汁，配上海膽感覺成個口腔都充滿鮮味。刺身之後係御料理，天婦羅穴子同埋茄子鋪喺碗上面，而最底下有滿滿蟹肉同埋日本腐竹，味道偏甜。壽司環節入面印象比較深刻嘅係網走喜之次、吞拿魚鮫同埋北海道馬糞海膽紫菜卷。喜之次微微炙燒過，未食已經聞到魚嘅香味。吞拿魚鮫係油脂比較高嘅部位，口感其實同大拖羅相似，但係佢嘅油分會再高少少，作為倒數幾貫壽司就啱啱好。海膽紫菜卷嘅份量真係令我覺得餐廳真係好大方，因為之前已經食咗兩道海膽前菜，冇諗過壽司環節仲會有一整行嘅海膽安排俾大家，幾推薦鍾意食海膽嘅朋友試呢個套餐。