漁釧 (V Walk) (已結業)

松葉蟹沙律估唔到咁多蟹肉，而且鮮甜有蟹味，用個木夾一夾全部都係蟹肉。啲菜都好新鮮好爽口，非常唔錯。天婦羅炸蝦啱啱炸出來熱辣辣，個炸粉唔會太厚，表面非常酥脆，就算點完天婦羅汁都唔會完全軟晒，鍾意食香口野嘅要試下。鰻魚卷有驚喜！估唔到原來呢個卷係咁多舊，仲要每一舊都大大舊。最鍾意嘅地方係，啲鰻魚每一塊都有炭烤嘅香味，食落口陣味超香。食完呢個卷都已經飽左七成啦其實。黃金軟殼蟹有成一隻，食落口陣鹹蛋黃香好正，但因為我地得兩個人，每人要食半隻，所以都幾膩。如果包埋紫菜食會無咁膩，好好多！隻蟹一咬啲汁就爆出來，非常好味。最好我地叫左個鐵板牛舌，係薄切，但好多塊，所以都幾抵。呢種牛舌嘅汁偏甜身，但我鍾意鹹食多少少。所以如果我再揀會揀牛舌串燒。但呢隻鐵板牛舌其實都好正！鍾意偏甜嘅人會好鍾意。服務方面都唔錯，啲員工加水加得好密。環境都幾靚，日式居酒屋設計，一格格卡位分開好舒服。整體來講，對呢餐好滿意。價錢唔係非常平，但味道同質素絕對對得住個價有多。非常值得一試。