名門私房菜

營業中

休息中

環境5分：有D西化嘅私房菜格局，兩條友都可以坐四人圓枱，D位隔得又夠開，非常之舒服，可以畀五分。衛生5分：餐枱舖曬白色枱布，環境衛生，每人兩對筷子，枱上有任用紙巾，非常之乾淨，滿分。服務5分：服務員年紀可能大，但非常專業同爽手，成日不停加茶加水同換碟，都畀滿分！味道5分：1) 招牌杏汁燉白肺湯非常清甜，飲得出絕對無落味精，真材實料。湯入面有白肺，豬肉同白果，杏汁味都非常之出。2) 蓮藕餅炸到脆卜卜，非常之爽。炸鮮奶好特別，椰汁味非常之濃，當然鮮奶非常之滑。3) 原條遼參扣鵝掌賣相非常之靚 ，有鵝掌，柚皮，遼參同生菜，非常高級嘅食材擺埋一齊。鵝掌炆到非常之淋，同埋好肥美好入味，應該炆左唔少時間，遼參發到大大條，食落口小小爽爽地，食得出係高級貨。4) 蝦乾魚肚大芥菜煲裡D大芥菜非常新鮮，真係不能錯過個湯底，非常鮮，加埋Ｄ爽魚肚，非常清新。5) 鮮蝦瑤柱荷葉飯份量超大，一打開塊荷葉已經聞到清香嘅荷葉味，蝦同瑤柱嘅份量都算多，食落去又唔會太濕口，濕度啱啱好。抵食5分：精緻嘅食材用心機用時間慢慢炮製，例如鵝掌遼參每人一份，又有其他食材例如蔬菜同飯就大大份，份量足，整體嚟講算係非常抵食。