WM Café & Bar (荷里活廣場)

營業中

休息中

今日到鑽石山開會，同事推薦咗哩間西餐廳，咁試試。餐廳裝修得好靚，好似入到森林咁。晚市提供數款晚市套餐，價錢唔貴，好多嘢可以揀。唔中意套餐，都可以散叫，都好抵食。主食升級跟餐，加48可以有埋是日餐湯，餐前沙律，柚子雞翼同即磨熱咖啡。餐湯足料煲制味道濃郁，沙律菜新鮮食落鮮甜爽脆，柚子雞翼皮脆肉嫩酸甜開胃，熱咖啡入口醇厚唔苦澀。巴馬火腿卡邦尼義大利粉，意粉煮得啱啱好，食落唔UN有咬口。卡邦尼醬好creamy，蛋香同芝士味好濃鬱又唔會覺得膩。巴馬火腿鹹香十足，撈埋啲醬同意粉真係絕配。慢煮BBQ烤豬肋骨，用慢煮加焗烤方式烹製豬肋骨，肉質燜到超軟腍。豬肋骨醃得好入味，食落甜中帶辣好惹味。旁邊嘅薯條炸得脆啵啵，點埋茄醬食到停唔落口。最驚喜係跟咗牛油粟米同烤菠蘿，粟米香甜軟糯，菠蘿清甜脆口，全部都係用心製作。法式焦糖燉蛋，面頭焦糖燒得好脆，下面蛋奶幼滑入口即化。燉蛋甜度控制得啱啱好，飯後甜品一流。