呦呦鹿鳴布丁燒

營業中

休息中

葵涌廣場有好多小食店，其中呢間布丁燒小店好出名。我好耐之前已bookmark咗，最近終於有機會買嚟試下。布丁燒有好多口味選擇，第一次食所以揀咗一個原味（雲呢拿）。我好鍾意食茶味嘅甜品，所以就揀咗一個伯爵茶味同一個焙茶味。布丁燒表面有有鹿圖案，而且杯杯都唔同，好可愛。芝士蛋糕表面比較深色，食得出淡淡芝士味，就咁食蛋糕的話會覺得有少少乾，濕潤少少會更好。如果有食過另一間布丁燒名店，有比較之下就覺得個芝士蛋糕體有進步空間。布丁細滑有蛋味而且唔會太甜。伯爵茶布丁嘅佛手柑香味突出同蛋味好平衡。焙茶布丁茶味濃郁，如果下次再幫襯都會揀焙茶味。原味布丁即係雲呢拿味，見到布丁表面有雲呢拿籽，應該係真材實料而唔係用雲呢拿香精，比起其餘兩款茶味，原味令焦糖味同雞蛋味更加突出，同芝士蛋糕都最夾，所以個人認為原味（雲呢拿）最好味。之後睇其他人分享先知道原來有一款椰爺布丁燒，布丁有椰子肉，聽落好特別，下次去開葵芳再買嚟試下。