18樓雞煲火鍋專門店

營業中

休息中

去過18樓雞煲位於荃灣分店，當時食過雞煲之後真係令人念念不忘再三回味。知道旺角都有分店後，立即叫返昔日戰友一齊去幫襯，大拆一餐。旺角分店裝修環境非常別緻，充滿懷舊Feel。地方好寬敞，又夠光猛，檯與檯之間有充滿安全距離，地方乾淨又衛生，食得安心又舒服。自助飲品區域都款式好多，汽水樽裝飲品應有盡有，仲有各款茶包茶沖好任君選擇。蔬菜方面都亦可以到雪櫃自取，蔬菜整體方面尚算新鮮。最期待既畫面，香噴噴熱辣辣雞煲登場。雞煲醬汁惹味香濃，唔會太咸，麻辣度剛剛好。雞肉嫩滑，保持肉汁。 當雞煲食到一半嗰陣，我地點左墨魚鬚、牛柏葉、豬皮、花膠等等，所有材料全部落坎雞煲煮熟黎食，配料緊緊吸晒雞醬汁，尤其個塊花膠又厚又大，好食到不得了，人間極品。食完雞煲後，跟住就加湯打邊爐。餐廳火鍋材料都好多款式，牛肉都有三款、豬腩肉 （肉類肥瘦適中）、雞、海鮮 （蜆、海蝦、鲩魚片、鱔片等）、丸類、餃類等等未能盡錄…...但誠意推介呢度既響鈴，即叫即炸又足料，響鈴吸收雞煲精華，一流至極。呢度個勝價比超高，$178 又好食又多野食，而且質素絕對係超水準，食完仲有整多個乳酪雪糕作為今晚結尾，無得輸。