御膳

營業中

休息中

隱世觀塘美食私房菜近排成日食日本野都好想食返啲粵菜，諗住約埋三五知己去啲冇咁多人嘅地方食餐好嘢飲下啤酒，所以就Search下睇吓朋友公司附近有咩私房菜好食，跟住睇到呢間御膳私房菜好似唔錯，就膽粗粗上去一試。話晒叫私房菜當然係啲隱蔽啲嘅地方，環境簡單但係私密度高，都係得四枱人左右，唔會太嘈。我哋叫咗個四人餐。嗰度冇酒牌所以我哋自己帶咗啲啤酒上去飲，當然其他汽水會有得叫。麻辣鹵水拼盆-有大腸、金錢肚、手撕雞，呢碟麻辣滷水拼盤好啱香港人口味，麻辣得來唔會太辣，而且啲滷水好入味，食落好惹味。砂鍋什菌龍躉骨湯- 鍾意飲魚湯嘅我當然對魚湯有要求，果然不負眾望，呢碟龍躉骨湯好有魚味，應該淆左唔少個鐘，而且好鮮味又有啲什菌伴湯同啲龍躉味好夾。汕頭鹵水鵝-滷水夠入味，鵝肉夠新鮮。薑沖炆龍躉腩- 龍躉腩大大塊，又夠鮮味，啲伴汁同啲肉好夾，食完一舊再想食一舊。金絲翡翠鳳尾蝦4只-呢碟菜一嚟到眼前一亮，因為排碟排得好靚，好有視覺享受，睇落都知好食，當然食落一樣係表裏如一，蝦有蝦味新鮮彈牙，元貝有元貝味。白胡椒爆炒南非鮑魚4只最期待嘅一碟鮑魚，用胡椒炒果然唔同啲，鮑魚非常彈牙好有口感，我哋差啲連啲汁都撈埋嚟食。