四妹廚房

營業中

休息中

今日去左荃昌中心果邊行街，平時行開天橋果層，落地下行果陣無意中發現左一間幾隱世嘅小店，叫做「四妹廚房」，主打一系列家常農家小菜。價錢唔算貴，夜晚七十蚊已經包飯同湯，於是決定入去試試佢。叫完野食即刻有湯飲，天天新款，食果日就係紅蘿蔔栗子雞腳粟米湯，飲得出唔係味精湯，而係用時間煲出嚟嘅老火湯，好飲過好多燉湯店！餸就要左糖醋骨，調味唔錯，好開胃，每件骨都有好多肉，食得好滿足。再叫左一份乳鴿，炸得好香口，肉質亦都好嫩滑。冷盤叫咗藤椒魚皮，爽口彈牙，唔算好辣但夠惹味。蒸魚都好有驚喜，食得出係新鮮魚蒸成，肉質好嫩滑，亦都好香。豆豉鯪魚油麥菜都好食，炒得夠香，好有家常味。飲品揀左近期好hit嘅手打檸檬茶，打得幾好飲，酸甜度適中，茶又唔澀，夠解渴！最後叫左香蕉煎餅做甜品，食得出係自己煎，甜度適中亦唔會太滯，而香蕉味都好natural，好食過好多小食檔！整體食得幾滿足，間唔中想食D住家味道嘅人可以過嚟試。