天星雲南米線

營業中

休息中

2024年最後半個鐘，睇住電視跨年Live Show......唔太能投入，不如寫埋篇食評。「天星」其實想食好耐，但次次去到一係未開門，一係夜晚排十幾人，總係失諸交臂。趁除夕經開旺角，過去一𥄫，居然有位，食喇緊係。店裏好逼夾，真係冇乜位，孭個袋大啲都唔掂。可以用手機QR Code點菜，有啲意外，呢間唔係老店咩，咁新潮㗎？睇牌面以為米線唔使四十幾蚊一碗，但原來係兩餸起，即係叫個韭菜豆卜米線已經要成50......如果餸多，大碗都ok嘅，但事實唔係。論味道，我好重視米線質地，「天星」啲米線係三流貨色，頂多當同普通譚仔打平手。餸、配菜味道ok，腩肉夠味嘅，係薄啲。鯛魚，好薄，冇乜咬口，但係爽脆嘅。聽講豬軟骨最有名，但我𥄫隔籬枱嘅豬軟骨，賣相好一般，冇興趣叫。評埋個湯底，試咗酸辣麻同胡椒麻辣，還可以，麻辣底同譚仔唔同，似似地營盤街某字號嘅「麻椒」。小辣都幾夠辣，唔食得辣嘅朋友小心。總算一了一直想食「一星」嘅心願，但應該冇回頭，啲Quota留返去荃灣食。