古今

營業中

休息中

銅鑼灣真係臥虎藏龍，呢間叫古今二嘅日本餐廳就藏身喺樓上舖，一入到去已經座無虛席，氣氛超級熱鬧，完全估唔到咁受歡迎。我哋第一道菜叫咗柚想蝦你嘅柚子沙律，賣相吸引，用咗新鮮柚子、生菜、牛油果、蘋果、車厘茄，再加埋中華沙律同蟹籽，食落清新又爽口，口感層次好豐富。之後叫咗一個火山，職員會即場點火，睇得又食得。火山係四件壽司卷，上面鋪滿蟹柳、芝士、蟹籽，真係似火山爆發咁，味道濃郁。黑龍卷都好推介，表面係牛油果同鰻魚，入面包住吉列蟹柳，外軟內脆，鰻魚燒汁香甜，食完一件想食多件。串燒方面，我哋試咗明太子醬燒玉子串同鹽燒白鰻。玉子串熱辣辣，加上鹹香明太子醬，口感滑溜又惹味。白鰻就夠晒簡單，只係加咗檸檬同胡椒，但魚肉彈牙得嚟好有鮮味。最後係安格斯蔥牛卷，牛肉燒得香口，入面嘅蔥清香唔搶味，配搭得好好。