うなぎ四代目菊川

營業中

休息中

總括而言，係我食過嘅鰻魚飯入面，可以話係全港最好食嘅鰻魚飯。心情唔好收工嚟呢到食下嘢簡直有種錯覺以為自己喺日本，喺日本食緊鰻魚飯，唯一拉返去現實就係個店員係講廣東話，但係無論係鰻魚飯定係個環境我都好享受。可惜我係I人，如果唔係我應該會企出去影住個師傅燒鰻魚，真係一大樂事。‣ 名物一本重 $385睇相你都知道係一條過嘅鰻魚，咬落去個皮燒得相當香脆，嗰浸炭燒嘅味道真係令人欲罷不能，真係唔係經常食到呢一個香味。咬落去嘅時候嗰浸油脂香滲入個口到，完全唔需要更加多嘅醬汁，值得好好品嚐呢一個風味。望落唔係好大份，但係食落去嘅時候其實都真係幾飽。以一個平時唔係好鍾意山椒粉嘅人嚟講，我個人幾鍾意佢嘅山椒粉，帶有檸檬嘅香氣，令到個魚肉都變得清新。除此之外都仲有七味粉，有少少辣先過癮。時令配菜入邊有蒟蒻都幾得意，漬物就正常發揮，個湯同日本飲到嘅清湯冇太大分別。用港紙嚟講呢一餐唔算話特別平，但係其實喺日本食都有咁上下質素嘅鰻魚飯個價錢都差不多，思鄉嚟食一流。如果真係要留港消費，我覺得值得嚟呢一到食鰻魚飯。