王牌冰室 (友邦香港大樓) (已結業)

去完大酒店，響附近搵食，見到呢間餐廳裝修幾靚，就入去試下。叫咗個兩餸套餐，一個啫啫雞煲，一個薑汁炒芥蘭牛肉。啲嘢食未嚟，響櫃桶攞餐具，但個櫃桶好污糟。啫啫雞煲嚟到，成個煲有八成係燒肉，得兩成係雞（最衰冇影相），同伙記講，伙記攞返入廚房加返啲雞件，正常返。到薑汁炒芥蘭牛肉，嚟到個樣無問題，但成碟餸係無調味，牛肉食得出係有用嘢處理過，所以好鬆軟，但成碟餸無味！叫個伙記嚟試食，佢食咗一塊牛肉，我問佢：碟餸有乜問題？佢話：無... 我再問佢：無乜？佢支吾以對咁答我：無... 味... 不過我哋同佢講：唔洗再攞入廚房換。我哋只想快啲食完快啲走。經理幫我哋改單，畀咗個八折我哋，折實 $135。隔咗十分鐘，餐廳經理過嚟了解事件，佢想知發生乜事。又問啲伙記係唔係無禮貌。我哋對伙記無投訴，只係投訴啲嘢食勁難食。隔咗五分鐘，有一碟滑蛋叉燒飯送咗嚟，我哋好意外。原來經理請我哋食，當賠罪。個叉燒蛋飯係正常嘅，所以我哋要求經理收返錢，最後埋單 $155。佢啲食物同個餐廳入面裝飾字句最襯：是是旦旦！