Italian Tomato Café (創紀之城五期(apm))

營業中

休息中

今晚我們喺觀塘apm戲院睇完戲之後去咗「Italian Tomato Cafe」食晚飯！我們叫咗個二人套餐：首先店員畀咗個忌廉湯我們，但一見到我們就已經覺得嚇親，因就算唔駛飲落去，都感覺到個湯係有幾咁稀，味道當然係淡而無味啦，真係令到我們覺得相當失望呀！秘製醬烤豬仔骨配薯條「全份」嘅肉質好鬆化軟滑，而且真係好大份，但所謂係秘製嘅醬汁就認真麻麻，因食落祇係感覺到酸味，完全唔覺得有咩咁特別秘製，至於薯條都算炸得幾香脆！廚師薄餅嘅餅底好薄身，餅邊亦幾脆，但中間嘅位置就極之韌，要好艱難先可以咬開，至於材料就唔算太過豐富，祇係芝士嘅份量比較多，所以感覺比較膩！另外我們再單叫咗香蒜香柏士圖意式風乾火腿意粉，但可以話係油浸意粉，因食第一啖已經成口都係油，感覺係超級油膩！去到最後嚟嘅跟餐甜品：士多啤梨芒果蛋糕同藍莓芝士撻係全晚咁多樣嘢食之中，我們比較滿意，因蛋糕嘅質感非常香滑軟綿，頂層除咗有芳香軟滑嘅忌廉之外，仲有鮮甜嘅士多啤梨，喺蛋糕中間層仲有香甜嘅芒果，夾埋一齊嚟食，真係超正呀！而芝士撻嘅撻皮有好香濃嘅牛油香味，芝士味亦好夠濃郁，但唔會過膩，而且頂層仲舖咗超多嘅藍莓喺面，真係好正呀！