段純貞X日出茶太 (The Johnston)

營業中

休息中

餐廳位於The Johnston地下，主打台灣正宗風味牛肉麵，另有飯類、小食、飲品、甜點供應，旁邊有間手搖店，堂食都可以叫佢哋嘅嘢飲。店內環境大，座位多，空間闊落，坐得舒適，最緊要地理位置方便且價格合理，適合約朋友仔食飯。清湯燉雞麵湯底清甜，雞肉嫩滑，胡椒湯酸菜豬腳麵帶香氣，酸菜十分開胃，豬腳亦唔嚡。麵條可以要手工麵或細麵，前者好粗身，帶咬口，QQ哋，煙煙韌韌咁，年糕feel，比較飽肚、後者入口滑溜，吸滿湯汁，各有千秋。小食方面會推滷菜，包含豆乾、杏鮑菇、娃娃菜、花生同麵根，醬汁惹味，配菜豐富，將麵條撈入去食都幾唔錯。台灣腸鹹鹹香香，一口一粒，方便食用。西生菜新鮮，感覺健康。甜品大大碗，私心推介台式綜合豆花，有綠豆泥、薏仁、紅豆、芋圓、花奶、豆花，甜度適中，豆腐入口滑溜、而經典款有純貞芋圓，包含仙草、紅豆、芋圓、透明珍珠、黑糖珍珠同愛玉，唔同口感聚集一齊，食埋就飽飽啦。