火鍋撚 (雲明行) (已結業)

叫得自己做「火鍋撚」，相信佢對自己嘅撚手食品—火鍋好有信心，結果佢冇拆自己招牌主打養生湯底，小妹試咗鎮店推介蜂巢豆腐白湯鍋同媽媽滋補老火湯。白湯鍋以人參、秘製蜂巢豆腐、鴨血、忌廉牛奶熬成，香滑濃郁；鴨血同蜂巢豆腐吸盡湯底精華，一啖咬件豆腐滿口濃湯，食到朋友們不停咁refill（可以無限免費添嫁！）老火湯就用淮山、杞子、猴頭菇、海底椰同黃油雞等材料熬成；真係有媽媽老火湯嘅風味，味道清甜。湯底靚，火鍋料亦出色。極品安格斯肥牛肥美嫩滑，但小妹更欣賞手切肥牛，肉味濃，肉質鮮嫩得黎又有口感。五色丸拼盤除咗一般蝦丸貢丸，仲有花枝丸、芝心丸。小妹要特別推介大家必食炸魚皮，即叫即炸，新鮮到放落湯底會有啪啪聲，炸得乾身仲非常之脆口，好熱氣但好好味！打邊爐會上火，所以佢地好細心咁會為客人準備腐竹糖水沙冰，用古代酒杯載，造型好有特色；啖啖沙冰都有濃濃嘅腐竹味，唔會因為係冰品而淡咗，清吓熱都唔錯！小妹仲想一讚佢嘅竹蔗茅根馬蹄水好足料，清涼下火之選！