雞駅花膠雞米線專門店

營業中

休息中

今次專登去觀塘「雞駅」朝聖，試佢哋個一人一鍋花膠雞米線！最正係每個位都有獨立電磁爐，可以自己控制溫度，啱晒我呢啲鍾意慢慢歎嘅人。 首先必試**姫松茸竹笙花膠雞米線**，一上枱就聞到陣陣松茸香！開細火慢慢滾，見到啲竹笙喺湯度跳舞咁，米線索晒湯汁超入味。花膠大大件，煮耐咗都仲keep到彈牙，雞肉就正常水準。不過要提提大家，滾太耐個湯會變鹹，記得適時熄火啊！ 另外試咗藥膳黃酒花膠湯米線（轉米粉)，個湯底真係冇得頂！藥膳味好濃但唔苦，仲有淡淡黃酒香，飲完成個人暖笠笠。轉咗米粉更加掛湯，每啖都食到藥膳精華。花膠同樣足料，同姫松茸款比，呢個湯底更啱冬天補身。 小食方面，麻藥蛋絕對係驚喜！滷得超入味，蛋黃流心之餘，辣度剛剛好，同兩款米線都超夾。食完成個set真係飽到上心口，但滿足感爆燈！ 環境方面，雖然鋪頭細細，但一人一鍋設計夠貼心，唔使同人逼。服務就自助落單，上菜速度都算快。