漢發麵家 (大南街)

營業中

休息中

下午茶時間都要等位，證明係有實力有口碑，最終等咗10分鐘至有。呢種相其實都睇到厭唔會認真去睇，不過奇怪幾乎間間都有發哥，真係佩服佢對食嘅熱誠。唔係話每台兩個人嘅咩，我坐低之後佢仲想喺我前邊加塊白板然後對面坐多過，我表示反對，佢都算從善如流無夾硬嚟。杯奶茶唔掂，鞋口，苦澀，一啲都唔滑唔香，而且價錢唔平。麵我叫之前已經問清楚侍應有冇鹼水味，佢話冇咁我嘛叫囉，結果第一啖感覺係微苦，食落去的確係唔覺㗎因為味蕾已經適應咗，咁係咪代表個侍應冇呃我呢？湯熱嘅時候仲幾香有薑蔥味，凍咗之後又係一浸鹼水味完全唔飲得。早知食出前一丁算啦。枱上面又冇醋，焗哽！豬潤好厚切，第一啖入口會懷疑佢係咪豬潤，因為喺屋企煮嘅唔會咁爽咁滑，但食落又真係好新鮮豬潤嘅味道，冇得唔佩服店家嘅功力。豬潤火候啱啱好，剛熟。店主五點幾就收檔，聽講係為咗陪屋企人，我諗呢張就係店主兩公婆小朋友畫嘅大作。