新泰東南亞餐廳

營業中

休息中

比卡媽媽話要去K11攞嘢，唔揸車坐火車一陣就到，出咗商場行過對面，比卡豬見到門口有架“篤篤”咁得意，係咁叫要坐，咁咪入去坐吓影吓相，知客姐姐仲好好相與，原來呢間係食東南亞菜式，橫掂都要食晚飯，於是行落去試試，原來下面別有洞天，地方算大，員工又好熱情，睇餐牌款式都好多!泰國青芒果沙律，兩個字形容“清新”，又唔會太辣，建議大家第一味就食，食完開胃；香芒軟殼蟹米紙卷，係我喺香港食過米紙卷最好食嘅，最怕食軟殼蟹食到“油億”味，所以呢度絕對唔係用萬年油；馬拉肉骨茶，兩公婆點個細嘅，原來都唔細，兩公婆剛剛好，飲落有淡淡藥材味飄出嚟，唔鍾意太重藥材味嘅朋友啱哂，而且排骨夠淋，不俗!泰式炒椰菜仔，唔多地方有得食椰菜仔，我老婆好鍾意食，連比卡豬都食，可能覺得似一個個波波咁；菠蘿炒飯，又係小朋友至愛，但下次我會試泰式燒春雞釀香茅黃飯，好吸引我眼球，仲有個麵包焗咖哩軟殼蟹，我見有幾枱都有叫，應該係熟客，包穩陣；菠蘿沙冰有驚喜，唔會得個甜字，好新鮮!埋單同經理傾咗兩句，原來呢度有幾間房，價錢唔貴，好適合大班朋友私人飯局；經理仲話下午茶照餐牌仲有8折，咁抵下次嚟開尖沙咀真係要過嚟食!