Be Leaf

營業中

休息中

平時行開觀塘見到呢間餐廳嘅門面都覺得好吸引，好有異國風情，一直都好想搵機會去試吓，今日放工終於有時間同朋友一齊去試吓啦。 一入到去環境好舒服好寫意，真係好似去咗度假咁，而且落單好方便都係就咁scan個QR code就可以落單。我哋嗌咗個香蔥鴨肉芝士墨西哥薄餅同埋香煎牛小排紅咖喱意大利飯，仲嗌咗一杯咖啡一杯梳打。本身同朋友都唔算大食，諗住一個薄餅一個飯就啱啱好，但唔好睇佢個薄餅好似份量好少，但其實入邊好足料，啖啖都食到鴨肉同埋芝士，而且香蔥令到成個薄餅更加Fresh，就算有芝士都唔怕漏。個意大利飯我非常之推介大家要試吓，紅咖喱辣度啱啱好唔會太辣，就算唔係好食得辣嘅朋友都可以試吓，咖喱味好香濃，同啲飯融為一體，同時亦都唔會搶咗牛小排嘅牛味，牛小扒非常軟熟，口感柔軟而多汁，肉味濃厚，而且份量好足唔會食唔飽，值得一試。另外亦都好推介大家焦糖咖啡，咖啡配有自家製焦糖餅，平時食焦糖味嘅嘢食，最怕就係太甜，但係呢個焦糖餅絕對唔會太甜，而且同咖啡非常夾，下次再嚟一定會再嗌呢杯焦糖咖啡！最後就係呢個焦糖pancake，同頭先個焦糖餅一樣唔會太甜，亦整得好鬆軟，作為一個晚餐嘅結尾非常滿足。