秋意 (成業工業大廈)

營業中

休息中

雖然觀塘人多車多，但係我都幾鍾意去觀塘工廠區覓食，搵啲小店試吓，發掘驚喜。之前都有聽過朋友話秋意嘅豉油雞好好食，平時唔食雞皮嘅佢，連呢間嘅雞皮都會食埋，仲話好滑好好味。今次就到我嚟試吓堂食啦。去骨豉油雞飯，豉油雞烹調後色澤較深，品嚐過後覺得味道唔會過鹹，反而帶少少甜。肉質滑溜，唔會柴口，啖啖肉。白飯表面灑上飯素，伴芝麻醬油麥菜沙律，仲有半隻糖心蛋，配搭豐富，平衡返成個便當。酸菜魚大大盤酸菜魚上枱嘅時候好吸晴，份量幾大，兩個人都差啲食唔晒。酸菜調味幾開胃，微微花椒香，除咗魚片仲有好多配料，包括芽菜、木耳、枝竹、寬粉。最鍾意食酸菜魚入邊嘅寬粉，吸晒湯底味，煙煙韌韌。平日晚餐時間都keep住有客人，仲有不少外賣單，證明都好多人鍾意食呢度嘅菜式，鍾意食雞嘅朋友記得嚟試吓。