勇記海南雞

營業中

休息中

古滑的雞 絕不滑稽人氣海南雞，紅磡 勇記海南雞 ，每日限量，開門前就已經要排隊，今日13:15去到排頭位，跟住到一點半已經超過20人排，繼生日群組後會唔會出現海南雞群組，由於武漢肺炎疫情關係，暫時停左堂食只做外賣，外賣由每日兩點開始，賣晒就無，一般6點前就無，試過未到5點已經賣晒。今日買左一隻海南雞分兩盒裝，淨睇顏色已經吸引，雞肉的確做得好滑好嫩有雞味，雞味唔算好重，雞胸位置都做得好滑唔會鞋，雞皮爽口，皮肉間仲有一層薄薄啫喱增強口感，層啫喱要做得好係好考功夫，另外一讚係佢哋個泰式醬，微微酸辣又夠香，濃度適中，完全唔會蓋過主角雞嘅味道，今日排左45分鐘係值得嘅。疫情下好多食店都停堂食甚至暫停營業，情況許可下大家不防外出支持一下小店，多一份支持，佢哋生存空間就大一點。