夏麵館 (寶石大廈) (已結業)

呢間位於荃灣沙咀道嘅上海菜館，地方乾淨企理，闊落光猛，裝修雅緻，坐得好舒服。雖然係周末晚餐時間，但人客唔算多，對鍾意靜嘅我哋嚟講可以更好咁享受美食。乾煸四季豆豆嘅質地唔錯，爽口得嚟味道唔會太鹹，加小小肉碎吊味令成碟菜更香口。XO醬炒豬頸肉豬頸肉肥瘦適中，爽口，同惹味嘅XO醬相輔相承，直頭係絕配。洋蔥同紅椒令碟菜冇咁重口味，但洋蔥略嫌辣咗啲。上海擔擔麵嚟上海菜館點可以唔試下上海擔擔麵。麵質偏煙韌，湯底濃厚嘅芝麻醬，偏甜，有啲膩口。鮮肉小籠包肉質同湯汁都算鮮味，皮略嫌厚身，中規中矩。家鄉煎餅口感較粉，唔夠香口，味道亦較淡高力豆沙炸到脆卜卜，豆沙蓉餡好香，甜而不膩，熱食味道一流