M Square

營業中

休息中

今日喺西貢玩完獨木舟有啲累，唔想特登行返咁遠出去市中心碼頭位置，所以就近近地就去咗隔離路程唔洗五分鐘嘅 WM 酒店食晚飯，今次都係食 M Square 因為貪平靚正。喺呢度食飯仲可以玩埋桌球，老虎機同虛擬哥爾夫球，而且唔使錢非常適合一家大細。以酒店餐廳嚟講其實呢間真心唔錯，餐牌菜式同之前好似冇乜大變動，而且仲無加價呢個抵讚，食啲意粉都係百幾蚊。平時都唔會叫沙律因為覺得唔值，不過今次朋友想試就試吓，估唔到都幾有驚喜，食材用料相當豐富，而且仲有幾多蟹肉。呢個豬肋骨每次都會叫半份 $229，份量十足之餘肉質軟腍夠入味，伴碟仲有酸瓜、沙律菜同勁多薯條。三文魚皮煎得夠香口，整碎撈埋溫泉蛋同南瓜粒食非常健康，米飯用上梅子汁調味，口感 Juicy 得嚟帶微微梅子味。