灣景廳

今晚係為家中嘅大當家~父親大人嘅生日晚餐。 其實呢間酒店餐廳不論家庭聚會或二人世界，平均一年差不多都幫襯十次或以上，甚至今年農曆年前嘅團年飯都係喺度食！ 講番今晚嘅主題就係「蟹」！有好多用蟹入饌嘅食物，凍食海鮮都係一般應有盡有~ 生蠔、蟹腳、青口、沙白、當然加埋配合主題嘅麵包蟹，真係夠曬選擇。小弟自己覺得生蠔較為可取， 可能只得半場食客關係，餐廳又refill得快，所以生蠔源源不絕供應，而且就如相片中所顯出又大隻夠肥美 另外推薦嘅就係刺身部分，其實最基本供應四款~ 三文魚、吞拿魚、甜蝦、同埋由七點半先供應嘅鮮帶子。各款刺身都好新鮮，我覺得食鮮帶子簡直係回本，形狀可以話大個一個五蚊銀，甜蝦都唔會吝嗇，一次過畀一執:約有十隻以上。燒肉類有燒牛肉同羊架，兩款都皮香肉嫩及帶少許脂肪(肥膏)， 又係抵食回本之作，其他如黑松露蟹肉蛋沙律配麵包、炸蟹餅、黃金軟殼蟹、仲有好多以蟹肉入饌嘅食物不作陳述。每人一客嘅梳乎厘龍蝦湯算係「中亭」， 特別甜品有一Round係要打鐘通知食客嘅十勝紅豆抹茶pancake 都唔錯， 飲品都頗多，汽水有可樂及雪碧、鮮橙汁、凍茶、凍啡。熱飲就咖啡機、檸茶， 六位以上送一渣啤