孖寶車仔麵

營業中

休息中

放工肚餓去葵廣醫肚，貪方便同快咁去食車仔麵，估唔到有意外驚喜。車仔麵配料有多達52款，選擇困難症又發作。$52三餸麵，結果再加兩款餸，因為實在樣樣都想食啲。作為食肉獸，點咗五香豬頸肉、豬大腸、牛腩、滷水豆腐同埋菜肉雲吞，配粗麵。其實可以改配腸粉，見對面位女士食腸粉，可惜本人麻麻腸粉。五餸麵好豐富，岩曬極餓嘅我。個人最愛係五香豬頸肉同豆腐。豬頸肉肥瘦適中，食落唔會肥膩或者成口油，口感偏爽口。炸過嘅豆腐再吸滷水汁，好入味，帶少少甜味，唔會死鹹 。豆腐有厚度，咬落夠實在。菜肉雲吞食落新鮮。豬大腸清洗及烹飪處理得好，唔會有內臟味。牛腩嫩，仲有一兩舊牛根。湯底係特製小辣，惹味，但唔夠辣，早知叫辣啲。不過可以加辣菜甫。簡單又滿足嘅一餐，下次黎葵廣除咗掃街仲可以食車仔麵。