大滾友火鍋 (紅棉大廈)

營業中

休息中

呢間火鍋真係book mark咗好耐，今日終於得閒過嚟試。餐廳晚市相當熱鬧，播住好響亮嘅鄧麗君嘅音樂，又播吓新年歌咁，令人即刻覺得好似過緊節咁熱鬧。餐廳嘅裝修同埋餐具都古色古香，打卡一流。玲瓏浮凸-花膠雞湯鍋（半隻）望過幾款湯底覺得呢款最吸引，職員會拎住成盆花膠喺你面前剪開再放落湯底度，湯底好鮮甜，忍唔住飲咗兩碗先。大滾友牛肉拼盤（細）呢個牛肉拼盤真係好豐富，可以一次過試晒所有牛，包括安格斯牛小排、手切牛頸脊、牛舌、牛柳粒同牛展等等，每款都入口鮮嫩。特別係個牛展入口好彈牙、而且好濃嘅牛肉味。大滾友雜菜拼盤個雜菜拼盤都幾足料，大份之餘有齊多款蔬菜。伊比利亞橡果豬一向打邊爐唔好豬嘅我，食左一塊呢款豬之後，發覺又幾好食🤤，加上油脂分布均勻，睇見都開胃。仲點左手打鵝肝墨汁墨魚丸同蟹黃餃，墨魚丸口感軟腍，入口都幾香。自家製足料竹蔗茅根打邊爐必點嘅下火飲品，夠晒清甜解渴。最後食埋個火焰豆腐花，職員上枱會先落啲清酒喺豆腐花度，再點著火🔥，份量都幾多，不過略嫌口感唔夠滑。