米走雞Deluxe (已搬遷) 新店位置

環境4分：門口個燈柱路牌，同入面Ｄ油畫好有特色。四周圍好多卡位，搭枱都唔迫，Ｄ櫈個cushion夠厚好坐，就算full house都唔會覺得好嘈，可以畀四分。衛生4分：地方好乾淨，電子爐衛生又安全，同隔離枱有塊簾隔開，唔怕彈到隔離或者比隔離彈到，最衛生就係Ｄ豉油同打邊爐醬料每次都係由雪櫃拎出嚟，四分。服務5分：樓面顆記好有經驗，拎嘢嚟已經提及雞煲正確食法唔應該兜亂，中途成日換碟，冇得唔畀五分。味道5分：1)  個黃金芝士雞煲一上枱，開火冚蓋煮五分鐘左右，等芝士溶化之後， 就可以先食雞。驟眼所見，大部分都係雞髀肉，有成十幾嚿咁多，大大嚿都好滑好嫩，雞肉下底仲有好多好爽脆嘅洋蔥，食完雞煲都差唔多飽左。2)  食完芝士雞煲可以選擇再加普通湯或者芝士湯變打邊爐。唐生菜新鮮，煮佢幾秒就搞掂，好爽脆，真係打邊爐必備。3)  竹笙雪白爽口，又係煮幾秒就食得，啱啱好可以中和個芝士雞煲。4)  魚皮餃半份有五隻，煮到浮面就食得，索曬個煲入面D芝士精華，個鮮甜嘅魚味出好多，非常之好食。抵食5分：一個百幾蚊嘅激量芝士雞煲絕對可以食飽成三四個人，其他火鍋料又唔貴，抵食絕對可以畀五分。