影片
更多
2014-09-17
2557 瀏覽
本身訂左潮庭, 但原來馬來西亞世叔住粵海，無奶油叫人地3號波仲有少少雨的晚上，捨近就遠，所以改BOOK粵海樓上的金燕島。可能因為都仲係3號波, 7點鐘晚飯時間，入席率尚不夠六成。其實咁樣相當好，環境安靜之餘，食客又得到比較優質的貼身服務。首先，一行到去門口就有三位知客姐姐一個部長歡迎我地，咁就感覺相當良好啦, 我第一次黎都有賓至如歸的感覺, first impression呢家野，赢哂!行到入去, 如前所言, 無咩人，間隔寬敞，非常舒服。最重要係部長、姐姐們貼身得黎又恰到好處地唔會覺得佢地好煩 (即係個D係唔係都幫你加茶, 食到一半強行收你碟話要幫你換碟個D)，幫你收拾的時候又會R你兩句水吹下, 都幾開心, 好有細個老豆阿媽帶我去舊式茶樓食飯既FEEL。野食方面，真係無得講, 單字一個 "正"! 我同世叔兩條友，唔食得多，只係叫左凍蟹、香菜煲、蠔餅、凍烏頭，都係好經典的潮州菜。我食凍蟹比較奇怪, 要落好多醋, 難得, D醋有味得黎又好清, 沾多了都仲食到蟹肉鮮味, 正! 之後上桌既係蠔餅, 喜出望外之作! 香港既蠔餅通常都係油炸, 貪其快靚正: 落鑊一炸, D發粉即時放大，大大舊, 好
可能因為都仲係3號波, 7點鐘晚飯時間，入席率尚不夠六成。其實咁樣相當好，環境安靜之餘，食客又得到比較優質的貼身服務。
首先，一行到去門口就有三位知客姐姐一個部長歡迎我地，咁就感覺相當良好啦, 我第一次黎都有賓至如歸的感覺, first impression呢家野，赢哂!
行到入去, 如前所言, 無咩人，間隔寬敞，非常舒服。最重要係部長、姐姐們貼身得黎又恰到好處地唔會覺得佢地好煩 (即係個D係唔係都幫你加茶, 食到一半強行收你碟話要幫你換碟個D)，幫你收拾的時候又會R你兩句水吹下, 都幾開心, 好有細個老豆阿媽帶我去舊式茶樓食飯既FEEL。
野食方面，真係無得講, 單字一個 "正"! 我同世叔兩條友，唔食得多，只係叫左凍蟹、香菜煲、蠔餅、凍烏頭，都係好經典的潮州菜。我食凍蟹比較奇怪, 要落好多醋, 難得, D醋有味得黎又好清, 沾多了都仲食到蟹肉鮮味, 正! 之後上桌既係蠔餅, 喜出望外之作! 香港既蠔餅通常都係油炸, 貪其快靚正: 落鑊一炸, D發粉即時放大，大大舊, 好似好抵食夾大件，但一咬落去, 空心既, 又成口油...W_W 實情舊底潮州人係用蕃薯粉/豆粉撈左D細細隻既蠔仔加蛋液慢慢煎, 用筷子拮落去"痴住痴住", 食落口"粘粘糯糯"，咁先係王道，而尋晚，竟然俾我搵得返呢種宜家響香港根本搵唔到既感覺! 蠔仔夠細, 餅底夠煙韌，配上魚露加胡椒粉，食到真係有D滾動到想喊出黎...可能因為珠玉在前，雖然香菜煲都好食，特別係D菜索哂排骨肉香, 送飯一流 (所以世叔追加左個白飯)，但係就食唔哂，有少少浪費左。凍烏頭都OK, 佢地D普寧豆辦醬更確係唔錯, 但係真係太飽, 所以又係食淨少少，食唔哂。
兩個人, 因為開左枝酒, 加埋開瓶費全餐1500有找，係貴左D, 不過偶然一次, 算啦。
後記：埋單個時，世叔問左阿部長哥哥一句，你記唔記得我呀...我以為白撞之際, 難得部長又應佢, 我記得~~ 我以為世叔老作啦, 點知佢又up得出原來呢間野好耐之前響星光行架喎。部長哥哥一聽到星光行呢三個字時，好似人間定格咁，眼神都溫柔左，大有good old days 個D FEEL. 之後，阿部長哥哥拍一拍世叔個膊頭, 望一望佢之後就行開左做野lu... 個種感覺我覺得好老香港，好溫韾。我從來都唔打食評, 呢次為左一記呢件事, 就去馬啦. 多謝收看。[合十謝]
張貼