御名軒

營業中

休息中

父母忽然想出去食晚餐，諗起天后有間一出地鐵就到嘅酒樓，中式晚餐一定岩佢哋口味。食中菜點少得燒味做頭盤，叫咗「叉燒併燒腩仔」，燒腩肉皮夠脆，但都唔夠叉燒正！完全估唔到呢度叉燒肉厚而鬆軟，加埋個超香甜嘅蜜汁，令我食到停唔到口！！踏入四月開始轉季，天氣悶熱，一家人叫咗個「海皇燉冬瓜盅」解暑，估唔到份量勁大，材料除咗有冬瓜粒，仲有鮮蝦、蟹柳粒、金華火腿...湯底非常清甜，飲完即時覺得fresh晒！「茄汁海虎蝦」極惹味，廚師將虎蝦外殼炸到脆口，但蝦肉咬落仍然彈牙，配上酸甜茄汁，非常開胃！「乳香藕片鮮魷」南乳味恰到好處，鮮魷藕片兩者都有咬口，唔錯嘅小菜。令我最期待嘅「紅酒燴牛尾」果然無令我失望！牛尾相當入味，而正都係個汁，用嚟撈飯一流！食到尾聲當然要食返碟菜，呢碟「馬拉盞通菜」味道極濃，鍾意偏咸嘅爸爸就最buy！晚飯後當然唔少得甜品，我哋叫咗「楊枝金露」、「芒果布甸」同「桂花紅豆糕」，全部都幾清甜，為呢餐晚飯畫上完美句號。