雪山冰廳

營業中

休息中

今日要去黃金買電腦，上網search下附近有咩好嘢食，發現有間翻新嘅冰室好多好評，「60年歷史，新裝修，新menu」咁話。搵呢間餐廳嘅時候，經過青山道嘉頓剛翻新嘅廠房寫字樓，嗰種「香港情懷」一湧而上。一邊黑白色牆身好有懷舊感覺，一邊白磚牆身加一幅頗有現代感嘅畫。避風塘生炸脾 - 估唔到比懷舊炸雞脾更好味，雞皮烤到香脆無肥膏，啲肉又唔鞋，不愧為招牌菜之一。波士頓龍蝦叻沙摻摻 - 估唔到隻龍蝦咁大隻，而且都幾多肉，賣相一流。摻摻係馬來西亞油麵同米粉「兩溝」嘅菜色，油麵粗粗而唔吸汁嘅口感，同吸汁嘅米粉配合下唔會太漏但又啖啖都有喇沙湯汁，好夾。海南雞飯 - 海南雞整得幾嫩滑，兩種醬都好正宗，忍唔住加多碗油飯，估唔到連油飯都好好食，我諗齋食油飯都可以食兩碗。樽仔奶茶 - 又係招牌菜之一，茶膽香濃又夠奶味，唔太甜又冰凍，好飲過一般嘅冰鎮奶茶。茶走紅豆冰 - 雖然唔係招牌菜，但我覺得呢個都係必叫嘅飲品。因為佢個奶茶底同樽仔奶茶有得揮，而且比起平時飲嘅紅豆冰冇咁甜，好飲到我飲到一粒豆都冇得剩。