金鳳大餐廳 (山林道)

營業中

休息中

今日元宵佳節，老公同我去鋸扒，亳不猶豫就諗到拍拖時經常去既金鳳，因為我最愛倒下醬汁時既咋咋聲，同埋有我哋最鍾意坐既卡位。餐牌有多款鐵板餐提供，每份有齊牛油餐包、餐湯、主菜、飲品。餐湯：羅宋湯加左好多唔同種類既蔬菜，酸中帶辣，惹味開胃；忌廉湯濃稠度適中，配上鬆軟既餐包，最佳配搭。蘇格蘭牛扒餐：牛扒叫左七成熟，煎得恰到好處，牛肉味濃，肉質軟嫩好少筋，黑椒汁香辣惹味。鴛鴦扒餐(豬扒+雞扒)：豬扒厚度適中，軟腍不死實；雞扒煎得香口，肉嫩無比，蒜蓉汁濃郁滋味。每份扒餐都係跟薯菜，我哋加左錢要一碟意粉，因為呢度既意粉煮得口感彈牙，仲掛滿茄汁。總結，金鳳鐵板餐一如既往，份量十足，定價親民，而且服務殷勤，所以係我哋鋸扒既必然首選。