新康記菜館

營業中

休息中

平日去長洲遊人不多，是日心血來潮來長洲一行探探張保仔洞，其後食番過個海鮮晚餐。長洲食店特別多，海鮮菜館亦不少。最終幫襯新開的新康記菜館，小店分左戶外和室內，依個天時坐室內有冷氣比較舒適。這裡環境明顯比其他店新淨光鮮，地方大座位寬鬆。五點半來店內食客只有我們，店員安排了六人大圓枱，餸菜唔駛左擺右擺，正呀！套餐有多種組合，幾款海鮮加炒油菜，三百元有找價錢相當經濟，份量亦唔少，味道唔錯都幾抵食。三款海鮮加炒靚油菜 $258蒜蓉蒸扇貝新鮮扇貝三隻鋪滿蒜蓉和粉絲，就咁蒸加點豉油，索晒汁鮮味好食。椒鹽鮮魷炸鮮魷香脆唔油膩，外層炸粉薄薄，口感脆卜卜加內裡煙韌，醮埋喼汁更是開胃好食。豉椒炒蜆大蜆好多隻非常足料，蜆肉新鮮乾淨冇沙，撈埋惹味豉椒醬汁，隻隻都咁美味。椒絲腐乳炒通菜簡單好食我最愛，鮮嫩通菜撈埋咸香腐乳汁已經好好食，加上薑汁味道好突出，掌握到其精髓，好食到要俾一百分。