金鳳大餐廳 (山林道)

營業中

休息中

今日去尖沙咀行街食飯，尖沙咀真係好方便，最緊要係多美食，行咗一陣見到金鳳餐廳，諗都唔諗即刻同朋友入去鋸返個扒先。平時去金鳳食都係去太子總店，我都唔知佢原來尖沙咀係有分店。入到去餐廳地方都好大，而且仲係好整潔好舒適。坐得真係好舒服。晚餐$178 餐湯羅宋湯加餐包，羅宋湯都好足料，而且味道好正宗，好香蕃茄味酸酸甜甜特別開胃，餐包亦都係熱辣辣加少少牛油真係唔錯。牛扒五成熟，鐵板嚟嘅時候店員會幫你加醬汁，見到鐵板治治聲真係好過癮，牛扒味道非常之香，而且份量重要好多，可能係五成熟嘅關係食落去牛肉味道好香濃，而且肉質仲係好嫩滑，加上有少少牛油嘅脂肪，令到牛肉味更加香。美國牛小排，加蒜蓉 185 元，牛小排仲好味，可能加咗蒜蓉，令到味道層次更加豐富，牛小排入口牛肉味香，蒜蓉味道同牛肉味真係好夾，好耐都未食過咁正嘅牛扒。金鳳餐廳真係出名牛扒正，性價比高，原來佢都有幾間分店，唔使特登去太子先有得食，真係正。