羲和雅苑

營業中

休息中

之前都同朋友食過，今次同屋企人嚟食，感覺依然滿意！餐廳坐得舒服，枱與枱之間有足夠空間，唔會太迫，配合維港景色，整體環境一流。服務生態度親切，落單時會細心介紹菜式，食到一半會主動加茶、換碟，服務幾貼心。 磚爐叉燒肥瘦均勻，外層燶邊微脆，蜜汁滲入肉質，咬落香甜但唔會過膩。肉質嫩滑，有嚼口但唔韌，食落充滿炭香 。份量足夠3-4人食，適合分享。 北京填鴨半隻，烤鴨即叫即燒，師傅席前片鴨，熱氣騰騰，視覺效果十足。配有八寶盒配料及薄餅，鴨肉可以用三種食法：脆鴨皮配爆炸糖，甜甜地又唔膩，口感特別；鴨腿肉蘸黃芥末，微酸帶甜，平衡油脂感；鴨胸皮脆肉嫩，蘸藍莓醬再點爆炸糖，入口後爆炸糖會跳動，好有趣。傳統食法係包薄餅加青瓜條、京蔥絲、甜麵醬，新派食法可試山楂條、紫洋蔥、藍莓醬，味道更有層次。 宮保雞丁加入藤椒，帶微麻香氣，醬汁濃郁但唔會過鹹，雞肉嫩滑，外層微微焦香，咬落多汁。配料有花生、乾辣椒、蔥段，增添香脆口感，麻辣度適中，幾醒胃，送飯一流。 干鍋菜花用石鍋上枱，保持香氣同熱度，微辣惹味，菜花炒得夠乾身，帶少少鑊氣，口感爽口唔會淋，吸收醬汁後更加香濃，每啖都充滿香辣滋味，係一道非常有驚喜嘅配菜。