金鳳大餐廳 (山林道)

營業中

休息中

細細個最鍾意同爸爸去食西餐，果種味道好耐未試過，今次去金鳳回味下。 聽人講好多人排隊，我地好早到，唔使排隊就有位坐。入到去就有種懷舊嘅感覺，紅色卡位加上侍應紅白格仔制服，而家好少見。Menu上美式扒餐好吸引，揀來揀去，嗌左份貴族牛扒同一份羊扒，為左健康，仲嗌左份馬拉盞通菜。頭盤餐包同羅宋湯，餐包又熱又鬆軟，羅宋湯暖笠笠。炒通菜好驚喜，價錢唔貴又大份，味道亦剛剛好，唔會太鹹，令我地胃口大開。之後上扒餐，賣相已經好吸引，淋左蒜蓉汁後好香。牛扒5成熟，鐵板煎一煎剛剛好，好淋身，超易入口。羊扒就有小小肥，不過真係好惹味，撈蒜蓉汁口感一流。食飽飽後嗌餐飲，細個飲黑牛飲得多，金鳳自創紅牛，嗌杯試下，有氣利賓納加士多啤梨味雪糕，真係冇唸過可以咁樣配搭，但又好好飲。我地埋單時差唔多8點，出邊開始排隊，呢個懷舊扒餐勝在性價比高，有細個嘅味道。