米走雞Deluxe (已搬遷) 新店位置

一般去雞煲店都好麻甩，環境污糟邋遢，呢間嘅裝修比較似高級西餐廳，私房菜咁樣，廁所好企理乾淨。剛坐下冷氣吹住頭，侍應即刻好熱心幫手較冷氣，而且個個都有禮貌。調味料會攞過黎每一台比你，唔使走黎走去自己攞。因為兩個人食雞煲好多肉，所以無叫牛肉，但係隔離幾台都有叫，個個都話好食。火鍋配料我地叫左炸魚皮，廣島蠔，手打牛丸，哈哈蝦中寶等。碟碟分量都好足，特別每舊蝦中寶都等於三粒丸咁大件。廣島蠔大件夾鮮味。手打牛丸係真係鮮牛肉製，唔係買返黎既雪藏丸。整體嚟講，樣樣都幾好，平均質素好高，特別麻辣雞煲唔油，而且用雞比肉所以真係啖啖嫩雞，唔會骨多過肉。火焰🔥雞煲唔至好睇，食落仲有濃濃酒味，加上麻香，叫小辣我既朋友唔食辣都食得好開心。