星記海鮮飯店 (一號廣場)

營業中

休息中

呢間中菜館連續五年成為米芝蓮推介， 啱啱喺9月份重開，位於中環扶手電梯附近，地點都算方便，所以中午都好多人幫襯。 樓面算係幾大，有幾個廳房，檯凳擺放得唔太密，都幾好坐 。 呢度中午同一般酒樓有啲唔同，係冇點心嘅，但就有推出88蚊嘅小菜午市套餐， 套餐包咗一個小菜、 老火湯同埋甜品， 價錢相宜，仲有得嘆下茶，喺中環嚟講真係好抵食。 ❤ 菜乾老火湯傳統老火湯嘅味道， 標榜冇味精，味道濃郁，湯料好多👍。 ❤ 馳名鳳梨生炒骨生炒骨大大碟， 肉嘅份量唔少， 外層炸得好香脆，淋上甜酸汁係好啱送飯嘅一道菜。另外亦都有好多新鮮菠蘿塊，唔會炒得太腍，保留咗菠蘿本身嘅水份，幾鮮甜。 ❤ 紅燒豆腐炆魚柳不嬲都好鍾意食酒樓整嘅紅燒豆腐，呢度嘅豆腐 好有水準， 又大嚿又入味，裏面滑嘟嘟。魚柳亦都有好多塊，每一塊都係煎過之後再炆，所以好香口， 而且入面完全冇骨，啖啖肉可以放心食。 ❤ 八寶糖水以為贈送嘅甜品係一嚿糕，原來係足料糖水，都有啲驚喜。有紅棗、雪耳、蓮子等等，感覺好滋潤好適合就秋冬天飲🥰。