Restoran Indonesia Kampung Kita

營業中

休息中

假期後嘅旺角，人流唔算多，經過花園街見到新開咗一間印尼餐廳，嗅到味忽然想食返串印尼沙嗲，即刻行入去試吓，地方唔算大只有五張卡位及兩張大檯，下晝六點已幾乎坐滿只能坐大檯同姐姐們搭檯，點咗黃薑飯、羊肉沙嗲同埋牛油果沙冰，飲品先到，可以飲到新鮮牛油果香味，沙冰夠滑但似乎唔夠凍。等咗超過半小時黃薑飯來到，竹盤盛上飯夠香，辣椒醬夠辣（有膠盒另上，自問唔食得辣就咪試），配菜有炸雞髀、牛腩、炸矮瓜、青瓜片、蕃茄、炸椰絲、炸魚仔同埋雜菜，味道唔錯翻炸雞髀雞皮夠脆但肉略微乾咗啲。食晒啲飯再等，等，等，終於見到沙嗲羊肉來啦，望吓個表，由落單起計足足係一個鐘先至到，係香港嘅餐廳要等一個鐘上菜的確匪夷所思，幸好食到冇令人失望嘅燒羊肉沙嗲，羊肉新鮮多汁冇羶味，炭爐燒得啱啱好。要你等一個鐘先有得食 你試唔試？