十侍 - 棉花糖A5和牛壽喜燒專門店

營業中

休息中

喺旺角一間隱世嘅樓上鋪，我發現咗一間高級日式壽喜燒餐廳，餐廳佈置都係日本風，環境幾靚。一入座叫咗個套餐，前菜係香甜嘅南瓜同埋蘿蔔。之後重頭戲登場：一盒附有認證證書嘅鹿兒島A5和牛，油花分布勻稱，色澤吸引，真係未煮已經流口水。壽喜燒鍋入面有多款新鮮蔬菜、蟹柳棒同埋彈牙烏冬，但最令人驚喜嘅係佢哋嘅獨門醬汁——甜味居然嚟自棉花糖！店員會喺你面前將一大團棉花糖慢慢澆溶入鍋，視覺效果十足，香氣亦即時飄出。而且，店員係煮牛嘅時候會過嚟幫你煮，問你想要熟啲定無咁熟，專業地幫你控制火候、幫手將和牛煮至最佳熟度，確保每一啖都入口即化，但其他時間會避席，比返私人空間比你同朋友，呢點值得讚。我哋仲加點咗幾串串燒，包括鮮嫩多汁嘅牛舌，再配埋兩杯清爽嘅mocktail，完美中和咗壽喜燒。最後甜品係煙韌嘅糯米糍，為豐富嘅一餐畫上甜美句號。如果你喺旺角想搵間又有氣氛又有質素嘅日本料理餐廳，呢間壽喜燒真係必試之選。